宗生選澤

 找回密碼
 註冊
搜索
熱搜: 活動 交友 discuz
查看: 29|回復: 0

苗僑偉拖住三嫂 型爆登六 「跨代」視帝 全天然無添加

[複製鏈接]
發表於 2018-1-8 12:26 PM | 顯示全部樓層 |閱讀模式
新聞來源:報章 » 擦邊 » 香港/澳門 » 東方 (on.cc) » 東方日報 » » 2018-01-08
新聞網址:http://orientaldaily.on.cc/cnt/entertainment/20180108/00282_009.html
相關:  


東方日報
苗僑偉拖住三嫂 型爆登六 「跨代」視帝 全天然無添加

三哥苗僑偉喺「登六」前升呢做視帝,個個直豎拇指,查實我Nuts哥覺得點止係馬來西亞視帝,直情係世界級「視」帝啦!呢位「視」帝點止拍劇收視勁,直情有最佳「視」覺效果、有視野同有眼光!由以前喺《射鵰》嘅楊康轉做黃藥師一樣咁有型嘅三哥,愈活愈年輕,全天然零人工化,同當年「五虎」嘅黃日華、湯鎮業相比,絕對係跑出,搞到班師奶春心蕩,諗起那些年電視撈飯懷春嘅日子,OL就話愈睇愈嗒糖,仲話三哥多兩條皺紋都冇所謂。

心境年輕 黃宗澤都啱Key
型到跌渣嘅三哥,由天涯被人讚到去海角,話佢乜都冇做就天生麗質,咁又誇啲!男人去到六十歲,最重要係條根夠硬淨,髮根嘅嘢,少一條就真係少一條,三哥平時Keep住焗油做Treatment,力保不失,真係一條都不能少!顧得上,又要顧下,佢好注重下半身運動,得閒玩吓步行機,話強化腿部肌肉,條腰都挺啲又唔寒背,望落去都零舍Sharp醒!熱衷打Golf,一日打六個鐘都唔會攰,甚至跑步、踩單車都一樣啱。講到尾,保持心境年輕,零舍啪啪聲有活力,睇佢同班後生仔好似黃宗澤等一樣啱玩啱嘴形就知!三哥話唔會提住自己幾多歲,當正自己係細路仔,有咩煩惱,瞓醒先講。有情有義,就算幫人都係收收埋埋,好似金剛早排自爆話多得佢雪中送炭,唔講真係唔知咁老友!

視覺效果一流,三哥嘅眼光都唔嘢小,娶戚美珍就知!一劇定情,恩愛到點止飛越十八層!戚美珍曾經高峰去到170磅,三哥只係話:「由佢啦!最緊要肥得開心!」佢仲話拍拖時成日嘈交,形容為八年抗戰,加上個個唔睇好,佢條氣更唔順,最後抱得美人歸。話冇狂蜂浪蝶就假,但佢話一個家都夠多嘢理,無謂喺出面自找麻煩。

買餸歎茶踩車都一齊
三哥對三嫂最難得係長情恩愛,攞視帝時都係一句:「要多謝身兼數職,照顧我嘅三嫂,呢個獎係你。」簡簡單單,冇驚天地泣鬼神,已冧到三嫂眼濕濕。細水長流,孖咇買餸歎茶踩單車,三哥公幹都要帶埋三嫂,話驚老婆一個喺香港好悶喎,你話幾甜呢!

諗頭多多嘅三哥目光遠大,唔想拍足一世戲,當年睇中眼鏡生意,同老婆拍住上,由一間小小嘅眼鏡舖,夾手夾腳發展到有五十間連鎖店,乘風破浪,最後賣盤畀財團,功成身退。三嫂話當年連Fax都唔知係乜,真係落心落力乜都學打江山。由靚絕五台山嘅戚美珍,變為校長口中嘅何文田肥珍,甘願犧牲事業、身形同青春同另一半共患難共富貴,正係唔少港男夢寐以求,一生尋找肯捱麥記嘅女人!唔嫌自己肥瘦老醜,陪着你走,陪着你抖,陪着你嘔,走過高山低谷,依然係佢拖住你!

Nuts哥
回復

使用道具 舉報

您需要登錄後才可以回帖 登錄 | 註冊

本版積分規則

小黑屋|手機版|宗生選澤 LoveBosco.net

GMT+8, 2018-1-23 07:56 PM , Processed in 0.105252 second(s), 17 queries .

Powered by Discuz! X3

© 2001-2013 Comsenz Inc.

快速回復 返回頂部 返回列表